十號風球3分鐘車程的士收400元　乘客大讚司機有良心惹熱議

大公文匯全媒體報道，在「韋帕」颱風襲港，十號風球期間，的士頓成為「搶手貨」。有港男在社交平台發文，分享當日乘搭的士的經歷，指從九龍宋王臺港鐵站前往聖德肋撒醫院（法國醫院），全程約3分鐘，車資為29元，另加371元附加費，合共400元，大讚司機「收得唔貴算有良心」。帖文旋即惹起熱議，有人質疑「好似曲線地講緊反話咁」。

該名港男21日凌晨在社交平台threads發文表示，「香港人真係好有愛，10號波好辛苦司機，每程車都係搵命博。宋皇臺站去法國醫院，咁近3分鐘路程都肯車我，仲要收得唔貴算有良心」。從其上載的相片可見，咪錶車資為29元，附加費則為371元，合共400元，至於單據上「總行駛公里」、「收費公里」及「收費分鐘」均顯示為「0」，疑似未正式起錶。

帖文引起網民熱議，有人質疑樓主「好似曲線地講緊反話咁 」，但有人認為司機冒風險載客，收取額外費用屬合理，「呢個價錢的確係收得好貴，但10號風球，要收咁貴我覺得可以接受。」、「一個願打一個願捱 perfect match! 」。

不少網民則認為司機劏客，「如果你係急去醫院，相信大把香港人願意車你一程」、「咁近都加成400，個客仲要係去醫院，都幾狼死」、「3分鐘路程加300，好過分啫」、「3分鐘，行去都得喇」、「咁近！慢慢行過去都可以」、「呢啲就叫做趁你病攞你命」。

另有網民覺得附加費好揦脷，「371蚊附加費咁零丁？」、「特登要湊夠400？ 」、「咪錶係到埗先㩒，咁近收四百，都幾進取」、「張單都幾假吓，冇郁過，撳禁附加費」、「$29 唔係正價。佢冇起錶行車。睇吓收據。」