年尾快閃旅行3款SIM卡推介　最平每日10蚊享5G

大公文匯全媒體報道，計劃年尾又或者年頭去快閃旅行，大灣區內地城市是一個不錯的選擇。除了要留意回鄉證有沒有過期外，更要在出行前準備好一張又平又抵用的電話卡（SIM卡）。究竟去邊度買卡好呢？邊張卡又平又靠譜呢？小編今次走訪深水埗鴨寮街、北河街等攤檔，睇睇店主推介哪些好用電話卡。

說起要買電話卡，市面上選擇雖多，但不少人第一時間仍會想起鴨寮街。這條素有電子天堂美譽的街道，齊集了售賣各式電子零件、配件等的攤檔，而出售的電話卡不單止款式多，而且價錢又平又齊。小編乘搭港鐵到深水埗，從A2出口一出已經是鴨寮街。除了鴨寮街外，附近的北河街、桂林街及汝州街一帶，亦有很多攤檔售賣電話卡，十分集中，幾乎每2、3檔便有一檔售賣電話卡，供應相當充足。既然款式這麼多，到底邊張抵用呢？檔主們推介3款卡給小編。

小編建議　買多啲更易講價

在深水埗電話卡攤檔可能不太需要格價，因為各檔口的差價通常只在5至10元內。與其格價，小編更建議在熟悉的店舖買多幾張，更容易講價，基本上買2至3張都起碼平5元，畢竟時間就是金錢。

另一個大家關心的問題，可能是這些卡到底靠不靠譜，小編就訪問了兩位前來買卡的街坊，兩人都表示自己是「回頭客」。陳先生表示：「第一次係我老婆整，又唔覺啲卡有乜問題，呢次同爹哋媽咪去旅行，所以再嚟買多兩張卡。」另一位黃女士就指出：「我唔止一次過嚟買，我買咗好多次。我一年都去幾次旅行，加拿大、德國嗰啲卡全部都係幫襯佢買嘅。」

此外，提提大家，本港電話卡實名登記已實施。店主指上述SIM卡都要先到內地才能使用，並要開啟手機上的數據漫遊功能。

櫻花卡性價比高　檔主：遊日好堅

除了大灣區外，日本也是熱門的快閃旅遊選擇之一。其中一款封面印有櫻花圖案的日本上網卡，性價比相當高。檔主解釋，「係呀，好堅㗎，docomo超好用唔減速，你出年去（日本）嘅話，你到時返嚟買吖。」小編再追問質素如何，檔主指出這卡最勁的地方是獨家，原來是指「升級版」，「5G無限，5GB 60蚊5日，無限唔使登記，即插機用。」見小編猶豫，檔主更主動說：「你要50蚊畀你，50蚊得㗎喇。我哋未輸過，賣到嘭嘭聲。」令小編都心動。

另外，如果大家要去一些小眾旅遊地，如斯里蘭卡等亞洲地方，有檔主推介一張亞洲12日上網卡，45蚊就有5GB，同系的亞洲卡有50蚊6GB的，都係爭5蚊但多1GB，同樣划算。如果去得更偏的，如非洲國家，可以簡單地買張全球卡，200蚊就有10GB數據，免煩。

買卡的時候，可以問店員攞支退卡針，有備無患。

中國聯通　365日全中國30GB高速上網

正價賣緊588元、現街檔標價190元的中國聯通365日全中國30GB高速上網，檔主表示：「真係高用量，睇片一流，仲可以用到WhatsApp、facebook等。」

HONG KONG MOBILE 4G全速數據國際漫遊數據循環儲值卡

正價268元、網站約賣138元，現在街檔標價只售105元，已包32GB數據，可以分享數據，也可以充值，有效期365天，開卡更送額外38元儲值額獎賞優惠，可用作增值、本地額外通話費、IDD通話費等。檔主表示：「賣105蚊，除開一年每個月唔使10蚊，十分抵用。」

中國移動　5G大灣區365日數據卡25GB全速數據

正價288元、現標價220元的中國移動數據卡，雖然是推薦中最貴的一張，但據檔主解釋：「佢係用中移動嘅網絡，不是借別人網絡的，全速數據，所以質素最高最好，仲要係原裝貨，信心保證。」同系的30日卡20GB則只需100元。

（來源：香港仔）