筆是機場｜學一半的民主

文/稀思路

因為日前震驚世界嘅韓國戒嚴事件，筆者喺網上見到有人介紹《12.12：首爾之春》呢套電影，於是筆者就喺周末，睇下呢套《首爾之春》所講嘅故事，點解令到韓國人對戒嚴有咁深刻嘅體會甚至恐懼。一路睇、一路睇，一直都以為搞軍事叛變一方會功敗垂成；點知，睇到最後，原來係正義嘅主角畀班豬隊友搞死，對方軍事叛變成功兼拿下政權。如果將電影放到今日嘅韓國睇，仲有冇意義呢？有，從制度、法治去講，韓國嘅民主，可能係「學一半的民主」；從人嘅角度去講，就係韓國從政嘅人，似乎對待政治、貪腐等問題，都係「有問題」。

韓國總統尹錫悅嘅戒嚴事件後，唔少媒體都即刻「細數」過往到底有幾多韓國總統出過事，例如韓國首任總統李承晚，實施高壓統治，直到1960年被指舞弊，被推翻仲要流亡美國；之後有朴槿惠爸爸朴正熙，曾管治韓國長達18年，但就喺1979年被槍殺。再再之後，透過政變奪權嘅全斗煥，因為暴力鎮壓光州事變同貪污，更被判死刑，之後改判無期徒刑，之後被赦免。

一直數落去，金泳三、金大中、盧武鉉以至李明博等，就算唔係自己出問題，都係家人被指貪污等等，韓國史上唯一叫做好少少嘅文在寅，算係避過咗青瓦台魔咒，不過，其實文在寅女兒嘅前夫都捲入薪資醜聞，會唔會燒到文在寅，都要再觀察下先知；如果連文在寅最終都係逃不過自己或身邊人有貪腐事件，咁即係所有韓國總統，最終都係……

講返近少少嘅現任總統尹錫悅，韓國檢方已經因為戒嚴事件組成特別搜查本部，部長亦證實，已經收到多宗舉報尹錫悅涉及內亂嘅相關案件，正在依程序進行調查，按程序嚟講，尹錫悅理論上已經係嫌疑人；最近消息（9日），韓國當局已經禁止尹錫悅出境，參與戒嚴嘅11人，包括被指參與策劃戒嚴嘅行政安全部長官李祥敏，以及被指提議尹錫悅頒布戒嚴令嘅前防長金龍顯，都已經被禁止出境。韓國電影產業咁「貼地」，睇嚟尹錫悅搞戒嚴一事，都可以成為電影題材。

唔同人睇韓國今次戒嚴事件，會有好唔同嘅角度，鍾意、傾向西方視角嘅人，會「讚」韓國係民主國家，今次韓國國民就成功制止咗戒嚴令。筆者之前都講過，自己睇嘢角度會有啲特別，其實由今次戒嚴事件，到之前絕大部分韓國總統冇好下場，歸結在於「學一半的民主」同人。先講制度，韓國法制至少表面係完善嘅，但咁多總統、總統家人出問題，係因為制度似乎防止唔到韓國總統或者其家人去貪；或者整個韓國嘅政商關係，係會令總統或者其家人好難唔貪。

可能有人會話，韓國民主制冇問題，過去到依家咪拘捕咗好多總統或者總統家人囉，如果係咁，咁話人有問題冇錯掛？推行民主制，唔止涉及制度好與壞，亦在乎人嘅素質，如果一任又一任總統涉及貪腐，即係韓國政壇上，唔少人都抵抗唔到金錢的誘惑。西式民主制，唔成熟，會貪腐事件不絕；太成熟，社會又會太撕裂，甚至催生出極左、極右等思想。當西式民主制主宰咗地球命運過百年，我哋唔單止要問美國、韓國等何去何從，更加要問我哋嘅世界，應該何去何從。