高鈞賢疑戴婚戒　下月公布喜訊

鄭裕玲與高鈞賢前晚出席服裝品牌的作品回顧展，左手無名指疑戴婚戒的高鈞賢未有承認或否認結婚：「下月初會公布，係開心事。我今年40歲喇，咁多年一直喺內地唔同城市奔波工作，依家定居深圳就係為咗近香港，除咗準備迎接人生一個新角色，亦因為媽媽啱啱做手術，覺得工作以外都應該投放更多時間喺香港。（早啲成家立室，多個人照顧媽媽？）都可以咁講。」

鄭裕玲對於黃子華有意與她再結戲緣，她坦言：「最初真係幾吸引，但佢依家每部電影都過億票房，對我有好大心理壓力，如果同佢合作嘅電影只收9千9百萬票房會點？都係要視乎劇本，因為唔理用咩演員，一劇之本先係最重要。不過相信子華挑選劇本都會好仔細，佢嗰一關都唔容易過。」

（來源：香港仔P16 2024/11/28）