爆拍賀歲片張繼聰笑到扭傷頸　阿Sa獲劇組贈現金蛋糕慶生

（香港文匯報記者 阿祖）賀歲片《祥賭必贏》日前正式煞科，劇組特意在片場為蔡卓妍（阿Sa）準備現金蛋糕提前慶祝11月22日的生日，阿Sa更爆料張繼聰拍戲笑到扭傷頸，現場充滿歡樂氣氛。

當晚煞科戲份於麻雀館拍攝，阿Sa、張繼聰、吳家忻與胡楓（修哥）等演員齊聚片場慶祝，劇組準備了一個獨特的生日蛋糕，配有啤牌、籌碼、麻雀及金幣等賀歲元素，並藏有寓意「大紅大紫」的現金驚喜，阿Sa邊揭生日牌，邊拉出一張張紅色和紫色大鈔，驚喜萬分地說：「現金啊，係現金啊，我第一次收咁嘅蛋糕呀！好鍾意個蛋糕啊，鍾意個餡呀，哈哈！」阿聰更帶領劇組高唱生日歌，阿Sa搞笑接唱「Happy Birthday to me」，場面熱鬧非常。

朱栢康笑到腹肌痛

電影轉眼已拍攝一個月，來到煞科日阿聰難捨開工歡樂時光，每日都跟大家即興創作爆笑橋段：「我哋今日就煞科啦，我覺得成個過程係超開心，亦都非常之愉快。我希望將呢個快樂放落電影，剪輯到一個好快樂嘅作品畀大家睇。」阿Sa則表示：「好耐未試過拍一套戲個過程係咁開心，每一日都好期待返工，可以同大家玩啊，一齊創作更多好好笑嘅情景同埋人物。我覺得太正喇，有少少唔捨得。」

阿Sa更爆料阿聰拍戲笑到扭傷頸，阿聰補充：「朱栢康笑到話第日起身周身痛，拍咗武打片咁，拍到腹肌痛啊真係！」修哥亦分享拍攝感受：「今次好高興能夠同幾位後輩合作，非常之開心，雖然係煞科，但係都唔捨得㗎，希望呢套戲叫好叫座。」

吳家忻見識喜劇魔力

首次參演賀歲片的吳家忻笑言：「今次係我第一次同咁多前輩合作啦，超緊張同埋超開心，感受喜劇嗰種好即場發揮嘅魔力，同埋好耐未試過笑到咁開心。」

（來源：香港文匯報B06：娛樂 2024/11/21）