巴黎奧運丨李克勤隔12年再任奧運主持 被爆「國羽隊頭號粉絲」綽號
![](https://dw-media.tkww.hk/dams/share/image/202408/03/66ade46be4b05e123807af08.jpeg)
(大公文匯全媒體 特約記者 陳惠芳)李克勤昨晚(2日)現身無綫奧運直播間《2024巴黎奧運 黃金直擊》擔任嘉賓兼客席主持,與觀眾一同直擊羽毛球混雙銅牌戰及金牌大戰,順道為好友、國家隊羽毛球混雙代表鄭思維及黃雅瓊打氣。最終鄭思維及黃雅瓊圓夢奪金,主持林溥來大爆身處直播間的克勤即開心得企起身,而鄭思維與黃雅瓊互相為對方整理金牌時,克勤則不斷歡呼兼大叫好溫馨。之後克勤與兩位好友越洋連線訪談時,「雅思組合」全程開心至合不攏嘴,氣氛相當好。
![](https://dw-media.tkww.hk/dams/share/image/202408/03/66ade418e4b05e123807aef5.jpg)
克勤相隔12年再現無綫奧運直播間表現未見生疏,渾灑自如。他更提供了不少鮮為人知的羽毛球相關知識及小秘密,當中包括國家隊羽毛球代表的訓練情況等;克勤說:「佢哋嘅訓練情況確係好刻苦同受人尊敬嘅,當然港隊運動員都係,我記得有次食完飯後去唱K,我問佢哋聽日唔使訓練咩,佢哋話:『要呀,不過唔係好早啫,七點(朝早)!』」克勤在直播期間還公開了與國家隊運動員打羽毛球的情況,片段所見克勤全程打得有紋有路。
![](https://dw-media.tkww.hk/dams/share/image/202408/03/66ade3b4e4b05e123807aef0.jpg)
與克勤已是老拍檔的鍾志光(鍾仔),談到克勤綽號是「國羽隊頭號粉絲」時,克勤笑言:「虛名嚟架啫,我都係港隊頭號粉絲嚟。」克勤又透露今屆的羽毛球混雙金牌,對其好友鄭思維很重要:「我好耐冇見過鄭思維係有呢種殺氣,因為佢幾年前失落咗個金牌,而嗰個金牌對於佢嚟講好重要,好重要,其實佢差唔多所有嘢都攞晒,淨係爭呢面金牌。」克勤又謂「雅思組合」自上屆失落東京奧運後有一段頗長的低潮期:「對於佢嚟講,之前嗰幾年係好難過嘅時間,因為佢哋拆過夥,後尾又走返埋一齊。」克勤續透,今年與鄭思維慶生時,對方的生日願望亦是能在奧運奪金;故對於好友願望成真,克勤坦言很替好友開心,「呢個係佢成個生涯裏面欠嘅最後一塊拼圖,我好戥佢哋開心」。
相關報道:
評論