（有片）何太鬧「廢柴律師係買牌」　翁靜晶斥會出律師信

大公文匯全媒體報道，近期城中熱話「何伯何太」事件，外界質疑何太滿身名牌，懷疑內地有物業，亦獲派住公屋，引起社會關注。執業律師翁靜晶之前直播，以法律角度講解何伯何太事件，近日有網民與何太交流時提起，有律師表示可能難以取回何伯戶口的450萬元，何太即「跳掣」並不點名批評律師，更質疑該律師的專業資格。翁靜晶近日就「買律師牌」一論笑指對方「佢都幾傻」。

翁靜晶上月曾以法律角度講解何伯閃婚故事，就何伯細女調走聯名戶口450萬元一事，翁靜晶表示聯名戶口要簽一張同意書，名為生還者條款，「都係長命契嘅原則，如果有一個人唔喺度，所有都係屬於另一個生還者。去銀行開呢類戶口嘅時候，通常都會寫明」，如果戶口是單簽，即戶口持有人在簽名前已協商單簽就夠，「假設其中一個人唔喺度，另外一個係可以攞晒，呢個銀行戶口嘅錢就唔係遺產嘅一部分。」

有網民及後分享有律師分析何伯能取回450萬元的可能性，何太即爆seed表示「嗱，你再提呢個律師嘅名呢，我證明你同佢係一派，一派胡言呀你」。「佢亂講嘢博流量，不擇手段，我都未告佢」，「我指嗰啲個別律師，冇專業嘅水準，係廢柴，個律師牌都唔知點樣得嚟，係買嚟嘅」。

翁靜晶昨日（10日）開直播，疑回應相關言論，「有人話，翁靜晶個律師牌，有人講個牌買返嚟㗎喎！哇，我聽到好開心喎！我就問嗎，係邊度有得買呀，我想買多個喎，如果有不如買多個，你介紹我買多個啦，要幾多錢？如果買得起，買多個都唔錯喎咁樣。」翁靜晶更笑稱「其實講呢一樣嘢嘅人，都幾傻。」

翁靜晶表示，自己做任何事都是先禮後兵，但仍然會聽取網民意見出一個制衡措施，「律師信係會出，出咗之後如果佢係好人嘅，佢行善良嘅路，唔好去傷害人，好好地去對家庭入邊嘅人，咁就唔會有下一着，但係如果佢好過分嘅，佢傷害其他人，我都可以隨時採取第二步嘅行動」。

相關閱讀：

何太放話無懼房署調查　嘲網民「當公屋好似佢條命咁」