家族榮耀之繼承者｜林峯阿佘出賣子溢咀戲　楊茜堯要老公跪玻璃

（大公文匯全媒體特約記者 陳惠芳）劇集《家族榮耀之繼承者》上月中在無綫播開播，首集收視火速報捷，更一直穩坐內地熱搜平台港劇第一位。日前總監製梁家樹、導演蔡晶盛和導演陳新俠，與一眾演員佘詩曼、林峯、黃浩然、羅子溢、梁靖琪、陳靜、劉江、余安安、張鳳妮、龔慈恩等舉行慶功宴。林峯為電影《九龍城寨之圍城》謝票後，帶埋「十二少」胡子彤趕到，林峯捧着粉紅色大蛋糕現身，全場大合唱生日歌，壽星女佘詩曼非常驚喜，笑眼瞇瞇，合十許願後吹洋燭，安安姐、張鳳妮、Toby等上前擁抱她送祝福。

劇中阿佘、林峯和黃浩然三角愛情關係，令人看得牙癢癢。最新劇情講到阿佘坐冤獄，她說：「雖然坐監，但有兩位護花使者喺我身邊，其實都幾幸福。」戲中飾演阿佘追求者、富二代「Rio」的黃浩然笑說：「我記得，好似一出獄即刻又搵我借錢啦！」三人哈哈大笑。

周旋兩位型男之間，觀眾都替阿佘頭痛，黃浩然說：「我老婆都有追劇，佢話梗係揀我，唔通揀阿峯咩？」林峯贊成：「我都係咁揀！」阿佘強調他們這三角愛情線發展非常緊張，網民熱議她在愛情與麵包中如何取捨。

該劇開播踏入第四周，浩然透露劇情將與阿佘講金又講心，他說：「嚟緊『Rio』終於唔使淨係同『皓兒』講錢，佢將有一場好情深嘅表白，好好睇。」

另外，羅子溢、陳靜（DaDa）和梁靖琪（Toby）自言是劇中「動作擔當」，羅子溢自爆網上新封號「丘家唯一男孫」令他啼笑皆非，戲中飾演胞妹的Toby說：「我以為你叫『渣男』！」又說：「我喺劇中好多動作戲，女仔之中我算係俾人打得最多。」子溢坦言劇中角色步入魔化。但他同時最艷福無邊，先後與梁諾妍和王敏奕等靚女有親密場面，他說：「我係愛情動作組，嘻嘻，有啲經驗咁啦！令對手舒服啲，冇乜戒心，可以放鬆，不過我都有俾人打。」有否與老婆楊茜堯一齊睇？他古古惑惑地笑說：「呢啲時候梗係走啦！啱啱嗰段時間幫小朋友沖涼，其實我有俾啲短片佢睇，佢睇完都『咦～』！」Toby落井下石，說：「係咪冇得入門口？」子溢笑說：「我膝頭哥損曬，仲未好返！」早前阿佘和和林峯網上直播時，將子溢與王敏奕劇中激咀場面給楊茜堯看，楊茜堯立即大叫，笑言要子溢回家跪玻璃！