後援會辦捐血義賣賀偶像生日　Gigi未能捐血感失望

（大公文匯全媒體 特約記者 陳惠芳）剛完成三場演唱會的Gigi炎明熹，稍作休息後，於上周六（20日）出席由「炎明熹粉絲後援會」舉辦、特別在Gigi生日月進行的捐血及義賣日活動。

Gigi說：「今次活動由舊年七月開始籌備，今日好開心可以同歌迷一齊做善事，除咗捐血之外，我哋仲有個義賣區，收益扣除成本全數捐贈APF愛培自閉症基金。」當日除了部分義賣精品一早被歌迷搶購一空，亦有接近一百位歌迷報名捐血，每位成功捐血的粉絲可獲贈印有卡通版Gigi的「Gi囡鎖匙扣」。身為偶像，Gigi亦打算以身作則，後因發現服用過中藥不能捐血，Gigi即時扁嘴失望，還用「好失敗」來形容自己。

提到活動前一晚，Gigi與歌迷在社交網站開Live，分享演唱會點滴。Gigi坦言尾場完show一刻，激動得不斷落淚，內心非常不捨，這段時間腦海仍不時浮現演唱會的畫面，她說：「不過當晚都有開心嘅時刻，因為終於可以飲汽水，到第二日，因為爸爸媽媽同細妹要走，陪完佢哋飲茶送佢哋離開，我就返屋企執屋，之後打邊爐，因為做show，我會避免食濃味同刺激嘅食物。另外，嗰晚有歌迷提議我搞busking，以前十三、四歲都試過兩次喺尖沙咀碼頭busking，嗰陣心情好緊張，因為未試過咁多人圍住聽我唱歌，而家都好想再試吓去海旁busking嘅感覺，希望大家可以嚟支持，不過未知幾時會搞。」

上周六除了是後援會的慈善活動，也是Gigi人生第一張實體唱片推出的大日子。為響應香港唱片店日，Gigi的第一首派台歌《真話的清高》，被印製成7寸黑膠唱片發售，由於是限量發行，多區的唱片店外出現通宵排隊的歌迷，在捐血日當天便有歌迷說自己「排第三個都買唔到」，甚至有歌迷在買賣網站出價9000元，求好心人割愛轉讓唱片給他。「我知道有歌迷凌晨四點已經開始排隊，知道呢個消息感動到起雞皮，如果真係冇晒貨，我會將我自己手上呢隻碟，送俾佢哋。」

不單只買碟支持，後援會更於港、九兩大旺區，買下LED廣告屏幕，播放Gigi的全新主打歌《還有一艘救生艙》，而Gigi出席完捐血活動後，親自去到尖沙咀拍照打卡，感謝粉絲對她的支持。