事業拚搏如「Man姐」　佘詩曼追求「極致」錯過姻緣不後悔

（香港文匯報記者 梁靜儀/文 涂穴/攝）「視后」佘詩曼相隔6年重返無綫演出台慶劇《新聞女王》，其飾演的電視新聞資深女主播文慧心「Man姐」，霸氣演出成了近日熱話，劇集最高收視27.9點（近180萬觀眾收看），成為2021年至今黃金時段收視冠軍，獲封為「演技擔當」的她更被睇好大有機會三度封后。 

《新聞女王》播映以來備受香港及內地媒體及網民關注，在網絡更引發連番熱話，是近年港劇少見的，身為女主角的佘詩曼(阿佘)又是否意料之內？阿佘直認對劇本好有信心。

首演女主播，阿佘事前更做足準備工夫，睇好多新聞劇集、電影、紀錄片及很多世界各地的新聞，無論是直播間或外出採訪。她認為今次跟過往演戲不同的是，不能憑空想像去設計一個角色：「冇一個人係冇睇過新聞，觀眾已經有一個特定模式，係冇得憑空想像設計一個新嘅出來，大家未必會接受，要入型入格先做到，呢一樣對我嚟講係難，首先要咬字好正，以前拍戲係唔准望鏡頭，但今次要望住鏡頭， 好端莊，原來唔坐上去主播枱都唔知，以為自己坐得好正，原來係有啲高低膊，有啲偏差，自己唔知道原來自己平時坐姿唔係最正確，只係最舒服嘅姿勢，呢點都要自己去調整。」此外，阿佘又稱是刻意運用低沉聲線去報道新聞。除了運用聲線增加角色說服力，有網民就讚阿佘「連眉毛都識做戲」，阿佘笑指誇張，但亦很開心獲得讚賞。

積極請教前主播陳凱欣

除了自己做足功課，阿佘更向兩代新聞主播「埋手」，她說：「其中一個係陳凱欣(現任立法會議員)，因為佢係我助手個妹，今次就係幫我好大忙，唔知佢有冇後悔幫我，因為我係不分晝夜發訊息佢，可能寫劇本嘅人始終唔係真係日日做新聞報道嘅人，點可以簡而精又唔會影響新聞，我遇到問題會請教佢。至於另一位是現任鳳凰衛視的主播。」

飾演電視台新聞部高層的阿佘，更是個工作狂、女強人，每次報道都追求「極致」，阿佘不諱言跟現實中的她很相似：「多年來她都專注事業上，亦好拚搏，好鍾意及享受自己的工作，好似佢（Man姐）咁，希望每一次都做到最好，極致。」說到Man姐的角色就像跟霸氣畫上等號，阿佘自言現實中不是霸氣的人，亦不需要，因她不是管理層。笑問到她可有參考電視台高層的霸氣來演繹角色？阿佘說：「首先現在我冇公司，我都冇話要效法邊個高層，亦冇一個高層咁狠，係劇情推動啫。」

說到劇集情節以電視台新聞部為背景，講述主播間的勾心鬥角及權力鬥爭，在演藝圈多年的阿佘又可遇過類似情況？她直言當然不會完全沒有：「完全冇梗係唔會，但會唔會咁誇張就唔會，可能工作性質不同，新聞係分秒必爭，好似我同George(馬國明角色名)，我搶先報就贏佢，但演員之間就唔存在呢樣嘢，唔係先拍完就贏，係睇出來個成果，亦都睇天時地利人和，所以冇得咁樣去爭，唔係一分鐘內決定贏輸，但新聞就會係。」

港姐出身的阿佘，相隔多年後再返TVB拍劇，她形容感覺就像回家一樣：「好似返屋企，行過以前啲路又會諗返以前點滴，好正。」

近年阿佘除參演港產劇集及電影，亦有參演內地受歡迎古裝劇《延禧攻略》及《鬢邊不是海棠紅》等，對於內地與香港在製作及文化差異上，她又覺得有何不同？阿佘說：「拍攝上冇乜唔同，當然唔同地方文化上係會唔同，好多俚語係唔同，點解我哋要貼地呢？係要脗合角色人物。」阿佘表示現時接劇，最重要都是睇劇本、角色人物性格能否吸引她，如果睇個劇本越慢，即是她鍾意個劇本，因睇的時候腦海中不自覺有畫面，已經開始設計角色，個戲係鍾意，就會接拍。

初演戲被批 感激TVB沒放棄

在TVB期間，阿佘演過的經典角色可謂多不勝數，更為她兩度帶來視后殊榮。問到在眾多經典角色，有哪一個角色，有機會都想再演一次？阿佘認真地想一想：「揀一個好難揀，全部都好鍾意，個個都好好，但演唔返，因為喺嗰個階段要做返嗰樣嘢至得，如果畀我今日演《金枝》(《金枝慾孽》)，可能我老練咗，唔啱當時個Feel，如果演《金枝》個年紀係演角色爾淳，之後《延禧》就要演嫻妃皇后，調轉都唔掂，因為冇嗰個歷練，好似釘姐在《使徒行者》個角色已經係九年前，現在叫我做，可能冇做得咁跳脫。」

作為演員，阿佘的演技兩度封后，演技已獲肯定，現時她對演戲事業又有何目標呢？阿佘卻說：「冇咩目標，我一向都係隨遇而安，見步行步嘅人，(想有更多人識佘詩曼？)冇諗過咁遠，我係好容易滿足嘅人，我顧及自我滿足多啲，同拍好戲，過程好玩，就算個劇集唔Hit，我開心咗就OK，出到來好好係Bonus，我着重個過程。」

Man姐一角受歡迎，同時阿佘初出道時演技被批的報道亦被重提，出道至今廿多年，阿佘直言當年拍完第一套劇集《雪山飛狐》後一度想放棄：「我畀人話到死呀，咁又無喊，我真係唔識嘛，我又冇學過，已經盡晒力。」當年曾被批演戲「雞仔聲」的阿佘，承認當時演戲像一嚿飯：「嗰時啱啱選完(港姐)就出嚟拍金庸戲，好大壓力，又唔識演戲，又唔識行位，一嚿飯咁，淨係着咗個件衫行來行去，個人好亂，冇自信，所以講嘢好細聲，佢哋咪覺得我『雞仔聲』，其實我係冇信心，最好你哋全部都聽唔到我講嘢最好呀，所以至有呢個『效果』出現咗。」

她當時曾一度想過既然都不適合，不如就不做，不過想法只是一閃而過：「因為卸任港姐後就要拍下一部劇，所以好多謝TVB冇放棄過我，繼續畀機會我拍，我都冇時間再諗傻嘢，之後就拍《雪山飛孤》、《刑偵》。」除了多謝TVB，阿佘還多謝拍檔陳錦鴻無私的教戲。她直言演技得到認同，當時有種爭返一口氣的感覺。

擇偶重溝通 望覓靈魂伴侶

事業有成，大家都關注阿佘的感情生活，阿佘認為結婚不是最後出路：「有當然好圓滿，但暫時我覺得自己人生好圓滿，我生活得好開心，做到自己鍾意的職業，已經係上天賜畀我一個好大禮物。」

阿佘透露現時擇偶，會着重溝通，想找一個靈魂伴侶多過任何條件，她覺得傾偈好重要，對方畀到意見她，可以商量，有得討論是好重要。保養得宜兼性格爽朗的阿佘，被問到現時可有圈中追求者？她笑說：「嗰啲畀人插晒旗啦，要結婚都結咗婚，仲邊有呀？（可能有漏網之魚呢？年紀細過你又接唔接受？）我思想成熟一啲，畢竟我都活咗喺60個角色入面，感覺上做咗60次不同嘅人，教識我好多嘢，體驗好多人生，我不知可唔可以同細過我的人溝通到，除非好成熟。」阿佘明言對象一定要令她崇拜，可以從對方身上學到東西。

問到她可有後悔當年為了事業，錯過了姻緣？阿佘直言沒有後悔自己當初的決定：「我決定得都係深思熟慮，我並非草率決定嘅人，既然我決定得係我想要嘅，當我將99%時間放喺工作上，我連親情都冇時間處理，現在個答案係成正比，好合理。」

去年阿佘為慶祝入行廿五周年唱歌，不過她強調只是想憑歌寄意送給支持她的人，絕對沒有想過加入樂壇，笑言自己沒有咁百變。

化妝：Katherine Lo

髮型：Lorraine Lam @ Hair Culture

服裝：Alaia @Harvey Nichols

造型：Christina Hsu

場地﹕TIRPSE@K11 Musea

（來源：香港文匯報B08：娛樂 2023/12/09）