渾水擬告蕭若元誹謗　連登仔嘲「兩條友狗咬狗」

大公文匯全媒體報道，攬炒派的「財經專欄作家」渾水，近日在社交平台發文話，流竄台灣的網台負責人「燈神」蕭若元在其YouTube節目中發表的言論，有誹謗之嫌，故正積極考慮透過法律途徑向蕭若元作出提告，正跟兩地律師團隊研究各種可行的提告方案。

有指「燈神」喺片入面話渾水人格卑劣，炮轟佢係某啲政治勢力的金主，但又唔駛着草咁得意。渾水在其fb專頁發表聲明指，蕭若元近日及在早前一月份於YouTube 的疑似誹謗言論，現在要求蕭若元立刻把誹謗他的言論及相關影片內容刪除；同時，要求蕭若元必須馬上登報道歉。

渾水又提到，曾經分析過阿一商業王國覆滅內情，包括「曖昧簽名門風波」、「蕭氏如何把三隻殼一次輸掉」以及「和愛國資本玩家合作營運餐廳的內情」，可能因而得罪咗「燈神」。

有網民將渾水份聲明轉貼到連登討論區，引來唔少網民食花生留言，「咪又係得個講字，炒新聞炒熱度啫，真係告先講啦」、「兩條友狗咬狗，想提高知名度，不值一提」，他們覺得「燈神」同渾水都係靠收啲「收妖股莊家錢起家」，就算收政治錢都唔會係主因喎。