傳劉愷威與新歡因小糯米鬧交　劉丹否認：孫女未見過李曉峰

（香港文匯報 記者 梁靜儀）劉丹（丹爺）、滕麗名、呂慧儀、林淑敏、許家傑及鄭世豪等，昨日出席《愛·回家之開心速遞》之「齊過冬至迎聖誕」宣傳活動，眾人又即場食湯丸應節。近日盛傳丹爺兒子劉愷威與新歡李曉峰因為「小糯米」而鬧交，丹爺笑稱孫女小糯米根本未見過李曉峰，直接否認傳聞。

丹爺表示要拍外景至晚上7時才能回家食冬至飯：「我同家人講咗，大人等到就等，小朋友肚餓就食咗先，留碗湯丸畀我就得，因為要團團圓圓、甜甜蜜蜜，阿仔劉愷威唔喺香港，農曆新年前至返嚟。」聖誕節將至，丹爺被問到可有買禮物給孫女小糯米？他說：「佢要求嫲嫲買禮物，嫲嫲買咗好多嘢畀佢，我聖誕就日日都要開工，都係交畀嫲嫲搞，最重要嫲嫲身上又有（信用）卡。」

談到近日盛傳劉愷威與女友李曉峰因為「小糯米」而鬧交？丹爺覺得傳聞很好笑，並說：「點會，因為小糯米見都未見過佢（李曉峰）。」說到有傳劉愷威同前妻楊冪有離婚協議，誰先再婚，女兒撫養權就歸回另一方，劉愷威因而不想再婚，令女友不滿？丹爺稱沒可能：「冇可能有咁嘅協議。（唔會俾人搶走孫女？）其他就唔方便講，我唔講大話，我全家都係信佛，信佛唔可以做傷天害理嘅事，講大話都唔得係犯罪，嬲人都唔得。」他又稱對傳聞一笑置之。

「熊家」齊讚炎明熹表現

另外，炎明熹（Gigi）近日客串《愛》劇，丹爺透露Gigi暫時只客串一集，對初次合作的Gigi，他讚不絕口：「我欣賞呢個小朋友人靚、唱歌好，做戲又好，其中一場戲要Gigi自由發揮畀反應，佢做咗個意想不到嘅反應，我入行做咗咁多年，都識睇人，佢前途無可限量，雖然佢一出道就好多人讚，但佢唔似其他人會飄飄然，佢好謙虛，反映屋企好，對佢真係驚為天人，好想同佢再合作，我同佢講，叫佢同公司要求得閒就過嚟玩幾集。」

滕麗名（阿滕）與呂慧儀亦大讚Gigi表現，呂慧儀指整個「熊家」同Gigi一起拍了兩日戲，覺得她淡定及醒目。阿滕說：「Gigi學嘢好快，第一日佢穿平底鞋，但第二日佢同袁文傑開工，即刻着咗高踭鞋，因為袁文傑好高，企喺佢隔籬唔着咁高就會淹沒人群中，要做漆黑螢火蟲。」兩人又希望之後有更多《聲夢》歌手以及《中年好聲音》歌手客串。

昨日冬至，阿滕表示剛好早收工，要回家煮飯，並笑說：「八餸一湯，真係煮到天光。」試過阿滕手勢的呂慧儀亦大讚，問到她同樣身為主婦，又可有下廚？她坦言：「我只係煮畀小朋友食，小朋友好容易安撫。」阿滕就指呂慧儀有次整飯團整多了，便帶了兩個飯團給她和丹爺食，丹爺食了一啖就強顏歡笑，而她就覺得飯團好硬不夠黏，呂慧儀即澄清飯團是工人姐姐整的，可能是用了泰國米煮才會不夠黏。

（來源：香港文匯報B11：娛樂 2022/12/23）