嚴防攬炒分子　齊向分化謠言說不！

稀思路/筆是機場

「損人不利己」係部分香港人，尤其係攬炒分子嘅典型心理，不論佢哋係抹黑警察、中傷政府甚至誣蔑中央，明明做咗唔會對自己有好處，但佢哋都「樂此不疲」地做，做完衰嘢好似仲好有「滿足感」咁；之前黑暴運動，香港警察成為最大受害者，竭力維護法紀嘅警察，不斷被妖魔化。情況去到今日，雖然香港已經有國安法，但仲有啲「小學雞」不斷透過假消息玩分化，甚至連中央支持香港抗疫都要反對；老老實實，中央支援香港，對香港百利而無一害，啲「小學雞」不斷玩分化，係咪想香港抗疫失敗，更多人感染病毒呢？

近排，一啲假消息充斥喺網路上，例如早幾日，就有人喺網上瘋傳2020年嘅舊相，圖片中有人聲稱「香港自己搞得掂」，言下之意，就係唔需要中央支援。類似嘅舊圖、假消息一個接一個，有傳媒日前仲發現，有人「講大話」指特區政府將會為內地來港支援嘅醫療人員設置唔合理嘅檢疫隔離期，營造「阻礙中央政府為香港提供支援」嘅意識；但事實係，內地人員來港暢通無阻，攬炒分子嘅言行唔單止係造假，更涉及煽動仇恨。

喺黑暴運動時，攬炒分子造假造謠，然後少部分市民又相信佢哋，呢啲謊言曾經「萬試萬靈」。果時攬炒分子老屈警察「殺人」，有人相信；話暴徒被警察「射爆眼」，啲人又信。但好似狼來了故事咁，少部分市民錯信完攬炒分子一次又一次，中過無數招之後，有足夠智慧嘅市民，當然唔會再輕易相信呢啲謠言。而且，只要認真諗一諗，今時今日，仲有邊個覺得喺抗疫問題上，有人會話「香港自己搞得掂」呢？

講真，如果要教化一班攬炒分子，等佢哋明白中央支持香港抗疫嘅重要性，咁係一種大愛嘅表現，不過未必好有用。筆者一向覺得治亂世，就要用重典，一啲中傷中央、分化兩地嘅言行，所涉及嘅都係假消息，香港依家雖然無法例禁止假新聞，但呢啲言行，到底有冇觸犯煽動罪行呢？例如係煽動人憎恨香港或中央政府，以至係煽動人反對政府工作，呢啲可能係執法部門可以研究嘅範圍；如果真係有人涉及煽動罪行，簡簡單單，執法部門直接執法，相信呢個係遏止歪風嘅最佳方法！

有分析指，一啲攬炒分子咁樣「玩分化」，其實係想內地同胞覺得香港麻煩，甚至俾錯覺佢哋中央對香港「厚此薄彼」；筆者就覺得，呢種想法真係「好天真，好傻」，啲攬炒分子可能唔清楚，其實好多內地同胞見到香港嘅疫情，都覺得內地可以出分力幫香港，所以根本唔會覺得支援香港有咩問題；仲有一點，就係香港係中國一部分，難道中央支援香港，支援一個地區，內地同胞會覺得唔妥當？呢個世界上，永遠都有啲人以小人之心度君子之腹；但歷史告訴我哋，小人係唔會得志，因為真理最終會獲勝。有啲人與其喺度搞分化，不如慳返口氣，幫手抗疫仲好啦！