來論丨保家衛國的悲壯歷史 《長津湖之水門橋》

稀思路/筆是機場

喺香港，一套電影點樣先算係票房收入高？三千萬？五千萬？基本上，一套港產片如果有一、二千萬元票房，已經算係唔錯。喺內地呢，一套票房收入高嘅電影，可以係用十億人民幣計算，最近《長津湖》續集《長津湖之水門橋》上映，開畫25小時，票房已經突破20億人民幣。《水門橋》電影再次說明兩件事，第一係中國人愛國而且關心國家嘅歷史，第二就係內地市場，實在比香港寬廣得多。

講開《長津湖之水門橋》，筆者要喺度分享下電影背後嘅歷史故事，當年中國抗美援朝，中國十分清楚水門橋嘅戰略地位，我國志願軍同美軍就展開咗一場炸橋同修穚嘅反復對抗，志願軍炸橋，美軍迅速修復；之後志願軍再炸橋，美軍又構築起橋樑；然後志願軍將橋樑同其基座一齊炸毁，美軍就喺日本運來組件，架設起可以通過坦克和車輛嘅鋼制橋梁。因此，美陸戰1師亦得以逃脫。水門橋之戰，除咗顯示美國軍工業嘅力量，更顯出我國志願軍不怕犧牲嘅英雄血性、機動靈活嘅戰略戰術以及精彩絕妙嘅指揮藝術。

睇到關於水門橋嘅故事，相信大家都會諗到，呢部《長津湖》續集之所以上映一日左右就有強勁票房，背後其實就係我國英雄、烈士為國家奮勇作戰嘅故事。以前好多人唔明白，美國出兵打朝鮮，點解我哋國家要抗美援朝，如今就算唔睇歷史而睇呢部歷史電影，都會明白到如果中國俾美國打到「屋企門口」，絕對係後患無窮；套用國家領導人一句話，就係「打得一拳開，免得百拳來」。情況同今日環境一樣，外部勢力成日想將魔掌伸入嚟（包括香港特區），如果中央唔企硬，我哋依家可能仲活喺混亂之中！

回到香港，其實《長津湖》呢類歷史電影，唔單止要喺香港上映，更應該成為中學、小學嘅歷史教材；用書本教授歷史知識？有人嫌太悶；帶學生到內地遊歷？Sorry，依家香港仲未同內地通關。用電影作為教材，係一種較為生動嘅教學方式；而且，當學生們見到國家英雄如何為國家艱苦奮戰，再諗下今日全中國人民嘅安穩生活，就會知道，我哋要珍惜今日所有，包括我哋得到國家嘅大力支持。

一套好電影，故事、製作同演員都係缺一不可，《長津湖》電話有唔少香港嘅著名導演等參與製作，足以證明香港電影人嘅水平同能力，處於極高水平。當香港電影人透過拍內地電影、合拍電影等方式融入國家發展大局，而且票房仲係「十億十億聲」，其他香港人，都可以從中睇到國家發展嘅機遇。近幾年來，我哋喺網上、新聞見到唔少港人返內地發展、貢獻祖國嘅故事，如果大家願意踏出第一步，下一個故事主角係咪你，who knows？