記者直擊｜逸葵樓內兵荒馬亂　有人收拾「逃亡」

【大公報記者方學明、黃山】葵涌邨逸葵樓被圍封前後，大公報記者全程在現場直擊，日間大廈保安與平常無分別，並無警員或工作人員把守，居民可以自由進出，有居民質疑猶如無掩雞籠。大廈內謠言滿天飛，有消息流傳將圍封三日，也有說圍封五日，是否要檢測也有不同版本的消息傳出，有居民「大袋細袋走佬」，有居民趕到附近超市購買糧食，準備迎接圍封日子。有獨居婆婆形容大廈內「好亂，好似打仗咁」，居民人心惶惶，自己就「被點來點去」。

「我一個人住，完全唔知乜嘢事，只係知道我下午起身時，門外面砰砰嘭嘭，一打開門，見到隔籬鄰舍有人執緊嘢，有人話趕住落街做檢測，話驚被傳染咩病毒，總之好似打仗走難咁，個個人心惶惶。」獨居在逸葵樓、滿頭白髮不願透露姓名的婆婆對大公報記者說。

消息滿天飛 不知可信誰

婆婆說前晚（20日）一切如常，不料未夠24小時後，竟出現兵荒馬亂景象，「我問人發生乜事，有人話全幢樓圍封三日，有人話五日，有人話唔做檢測會捉去坐監，有人話要搬屋，有人話要去超市搶糧，我都唔知信邊個。」

婆婆於是下樓周圍問人，但人人支吾以對，她走到大廈對面球場的採樣站，見到球場內有百多人排隊準備檢測，卻被職員要求走到近半公里外的其他採樣站，「佢話做清潔，又話我哋大廈傳染病毒高，但點解又要我哋走咁遠做檢測？」

記者陪伴婆婆走到其他採樣站，婆婆一邊行，一邊質疑政府指示不清楚，「如果我中咗病毒，已經傳咗畀成條邨嘅人啦。」被問到是否擔心感染，她爽快地說：「我有乜未見過？殺到嚟咪食，就係咁簡單。」

手停口停，誰人賠償？

在停車場公司上班的曾小姐，昨日清早六時半離開逸葵樓住所返工，出門時無人阻攔，昨日下午放工回家，見到大家人心惶惶，聽聞有可能被圍封多日，立即跑到附近超市買乾糧，「如果有得搬，我都搬，但我無其他地方住，唯有留低。」她擔心圍封後不能返工，「我都唔知點算，要同老細請假，但我哋做散工嘅，手停口停，咪即係無咗幾日收入？有無人可以賠償損失？」

家庭主婦邱女士下午趁圍封前趕回屋邨，匆忙到超市、街市購買乾糧、豆腐及菜等食物。「圍封五日，唔畀離開屋企，梗係要買多啲食物儲糧。」她與15歲讀中學的女兒、四歲讀幼稚園的兒子住在逸葵樓。

「大廈衞生情況不差，清潔工有定時定候清潔升降機按鈕、扶手等。」她最不滿是街坊的衞生意識低，「好多長者經常喺公園唔戴口罩行行企企，周圍吐痰，我覺得佢哋最容易傳播病毒。」

邱女士說，大廈有少數族裔人士居住，主要是巴裔家庭，「我知道今次係因為巴裔夫婦將病毒傳開，但我唔識佢哋，亦唔知邊個，但見佢哋經常將口罩拉到嘴邊，懷疑因而播毒。」