來論｜《眾新聞》點解驚? 　新聞自由唔係「萬能Key」

筆是機場/稀思路

繼反中亂港嘅《立場新聞》後，「相同立場」嘅《眾新聞》（簡單啲，下稱為《眾》）亦宣布停運，一時之間，啲人梗係會繼續搬出「新聞自由」、「傳媒受打壓」等等，《眾》嘅主筆楊健興，話《立場新聞》係佢哋停運嘅觸發點，當中顯示咗「串謀發布煽動刊物」嘅問題，一啲訪問、報道被視為煽動刊物，擔心會犯法，停運係無可奈何，仲話「我哋已經唔能夠掌握得好清楚，唔能夠喺一個感到平安、安全嘅情況之下工作落去」。《立場新聞》有文章涉嫌違法，有高層、前高層被捕所以停運；情況套用喺《眾》身上，筆者就覺得，重點在於《眾》嘅領導層點解要驚？係咪自己「心中有鬼」？

對於楊健興嘅講法，包括「唔能夠安心做新聞」，大家首先要諗諗，喺香港，網媒唔止得《立場新聞》同《眾》，其他大大小小嘅網媒，就算無一百，都可能有幾十個，點解其他網媒唔驚、唔停運，而《眾》要擔心、唔安心甚至驚而要停運呢？思前想後，唯一合理解釋就係佢哋都知道自己有報道或文章踩界，甚至可能觸犯法律！

睇返公開資料，《眾》喺去年10月，當時保安局局長鄧炳強喺行政長官2021年施政報告記者會上就《基本法》第23條立法進行解說，其間有記者問有關立法會否「以言入罪」，鄧炳強清楚解釋犯罪需要有行為以及意圖元素，並有充分證據等，並非一句說話就可以入罪，但係《眾新聞》其後報道稱保安局局長「拒絕保證基本法第二十三條立法不以言入罪」，保安局之後就公開表示對其誤導性報道深表遺憾。呢一種報道手法，有冇問題？

如果認為「玩文字」、「玩誤導」唔算犯法，大家又可以睇下，去年12月，即係「逃犯」羅冠聰出席美國嘅所謂「民主峰會」前，就接受咗《眾》嘅訪問，羅冠聰喺訪問老屈中央侵犯人權，仲借機抹黑香港嘅立法會選舉。用《眾》嘅角度，佢當然話自己係「做新聞」啦，但從正常以至執法嘅角度睇，一個媒體去訪問一個反中亂港嘅通緝犯，然後又明刀明槍俾羅冠聰抹黑中央同特區政府，呢種做新聞手法，根本就係踩界。

喺呢度，筆者必須講清楚，新聞自由，絕對唔係反中亂港勢力搞事甚至涉嫌違法後攞出嚟辯護嘅「萬能Key」，之前《蘋果日報》創辦人黎智英以至其他前高層被捕，明明涉嫌違反香港國安法，甚至係用錢資助「顛覆」活動，啲人話係新聞自由；到《立場新聞》人員被捕、媒體停運，啲人又話係新聞自由；好喇，依家《眾》驚自己報道涉嫌違法，又係新聞自由？其實，如果新聞自由可以凌駕一切，咁人人自稱新聞從業員或者「獨立記者」，咁咪做乜都得？！

今次《眾》停運，最主要應該係怕觸犯《刑事罪行條例》嘅煽動罪，煽動罪就如絕大部分刑事罪行一樣，除咗犯罪行為，控方仲需要證明被告嘅犯罪意圖，《眾》依家表現驚青，其實佢哋有冇犯罪意圖呢？一個好吊詭嘅分析，如果有犯罪意圖，其實停運都未必可以免去刑事責任；相反，如果從來沒有犯罪意圖，又駛乜驚會跌入法網呢？