郭富城做「順得人」爸爸

（香港文匯報記者 李思穎）郭富城在主演電影《秘密訪客》中扮演高冷、沉鬱父親，他接受主播許文軒訪問，談到再次演出爸爸角色，說：「電影有趣嘅地方係我可以接觸一啲從未演出過嘅人物性格，令我喺人生中，曾經同呢個角色生活過，不過拍完就算。真正嘅爸爸角色就留返喺屋企做，做一個『順得人』爸爸，現實要做一個好爸爸，畀多啲愛、關懷、忍讓小朋友，要畀多啲耐性，我自己都係學習當中。」

以往城城會玩賽車去釋放角色中帶來的情緒，現時他會寫書法來淨化情緒，他謂：「我七、八年前開始鍾意油畫、水墨畫，自己亦有收藏畫作，因為疫情關係冇得去賽車，反而對畫畫嘅興趣越來越濃厚。因為自己鍾意水墨畫，所以老師叫我由書法開始學習，發現自己全神貫注去寫字嘅時候，原來可以淨化到情緒。（學習到什麼階段？）都係初學者，唔叻！但自己好喜歡呢個藝術。」