陶傑幫口劉細良　網民批「護短」錯焦

（香港文匯報記者 黃書蘭）網台「城寨」創辦人劉細良成日喺網台叫「手足」課金，但日前就俾《蘋果日報》揭發佢以4,380萬元賣出豪宅，令唔少黃絲都呼籲「同路人」停止課金惠顧。不過，專欄作家陶傑日前卻撰文給劉細良「幫口」，稱「出售物業，價值四千多萬而套現，不算大數目……其中質疑的人，又以文人為先。文人沒見過大錢。」唔少網民都鬧陶傑「護短」，直指佢根本冇捉到重點係呻窮而要求課金，結果卻坐享千萬。最尾搞到陶傑雖然都堅稱啲網民情緒化，但都終於承認劉細良需要同支持者交代。

劉細良被踢爆疊水仲「籌旗」，連日來俾唔少「手足」呼籲杯葛。陶傑日前喺《蘋果》撰文稱：「數以千計的抗爭年輕人，身陷囹圄，或面臨被起訴，他們來自基層。一年來一起抗爭，若曾經積極鼓勵和策劃的指揮人士，現在可以席捲幾千萬安全撤退，離岸繼續安全發聲，同時接受課金，在帳（賬）面上，形成的貧富懸殊，就有一點點道德的爭議……何況網民之中，必有對家的勢力摻糊在內，挑撥分化，不斷強調為什麼他有錢、他安全……」

對於陶傑嘅東拉西扯，唔少網民就鬧佢護短。「文豪偽」話：「其實陶傑的大部份（分）『評論』基本上都不是評論，陶傑談邏輯的時候通常都不通邏輯。都是穿鑿附會，東拉西扯，然後提出天外飛來的結論。還有就是，這人每次身邊的伙（夥）伴出了甚（什）麼事，就會寫篇X文護短……我認為他說甚（什）麼都沒甚（什）麼所謂，無論如何他會×up（噏）到天荒地老。」「Johnny Li」都話：「真，拋唔關事書包就直落結論。」「嚴小飛」就話：「抽水是工作。」

有網民就指陶傑錯焦。好似自稱「獨立記者」嘅「白影」就發帖話：「其實問題係呻窮羅（囉），佢唔呻窮其實我真心覺得無問題嘅，一買一賣，但當你呻窮而要求啲讀者多啲課金，而結果可以坐享千萬，呢個先係問題所在。」「Ching Wing See」就話：「其實啱價人人都應該賣樓……但要窮人將辛苦搵黎的（嚟啲）錢供畀有錢人無良啫。」

見啲人反應咁大，陶傑噚日就又撰文同接受電台訪問話，有數以千被捕的民主抗爭者都是窮人，劉細良於此事以高價賣樓，「在政治上，確實予人的感覺不太好」，又稱對批評表示理解，陰陽怪氣話「事件主要是令情感上或令一些批評者不快，但網上有部分批評確實比較情緒化。」

佢噚日又回覆媒體查詢話，香港嘅「政治評論KOL工業」，係由2019年修例風波後先真正蓬勃起來，於社會氣氛冷卻後，當有人見到這些KOL賣樓、離港，情感上當然會不快。不過，佢就唔會具體評論劉細良過往言行、與其他KOL之間嘅恩怨孰是孰非，但指「佢（劉細良）應該向自己支持者交代」，否則長此下去，或影響網民對這些KOL的信心，對整個網上評論人的生態造成損害。