貴圈真亂 | 返工「射波」被炒　黃民黃店互片

員工借賬號數臭上司 店方發文還擊變羅生門

（香港文匯報記者 郭家好）其實黃店同黃絲嘅本質都係一擔擔，因為有可能黃店刻薄對待黃絲員工嘅同時，員工都成日無責任地「射波」，兩邊都幫唔落。講緊嘅係有黃店「Cosmos Restaurant & Bar」前員工竟借人哋賬號「倉鼠隊長ABI」喺「連登」發帖，指佢返兼職樓面，有一日佢唔舒服想請假睇醫生，講明會畀醫生紙都照俾人炒，搞到好嬲好委屈，又話之前已經有同事因為請病假俾人炒。不過，日前「Cosmos Restaurant & Bar」就喺facebook發文回應事件，話成件事得啖笑，並逐一反駁呢位前員工嘅指責。感覺真係一場羅生門。

由於好多餐廳長期請唔夠長工，變相兼職同「炒散」員工分分鐘多過長工，而兼職同「炒散」員工「射波」又唔需要假紙同扣糧，所以佢哋「射波」嘅機會率都幾高。不過，打得份工就要有責任心，唔想返工提前講係常識吧！

話說，呢位前員工借人哋賬號「倉鼠隊長ABI」話，佢有日病咗想請假，亦都主動講明會睇醫生並攞醫生紙，結果俾佢上司「Sa姐」話佢玩嘢所以炒咗佢。其實呢位「Sa姐」之前都有咁對過其他前同事，包括有一次有位員工病咗想請假，「Sa姐」就喺群組入面單單打打位員工，話以後邊個「射波」超過三次就唔使再返工，及後涉事員工喺群組入面公開佢嘅醫生紙，「Sa姐」竟然覺得不滿，並譏諷：「咁叻仔啊你，竟然喺度send出嚟，你唔係私下畀我咩？」態度惡劣至極。

之後，「倉鼠隊長ABI」就列埋間黃店嘅罪名排行榜，包括拖糧成性，「曾經有同事趕×住（出糧）找卡數，佢（上司）都可以唔×理人……」，員工又爆料話舖頭好多嘢都係淘寶貨，又試過曾經欠供應商錢、當員工係出氣筒等等。

有見及此，好多「連登仔」即撲出嚟鬧爆間黃店。「鹿田」認為：「一間公司連對自己嘅員工都唔負責，你覺得佢點會對社會負責？」「記得初衷不放手」話：「當『手足』condom，以後當黑店處理。」

黃店稱無拖糧 逐一反駁指責

點知事情峰迴路轉，「Cosmos Restaurant & Bar」日前就喺fb發文回應事件，聲稱話佢哋無拖糧，更曾有同事趕住找數，老細（闆）特登按（撳）cash出糧畀佢。對於罷工，該店揶揄佢哋（員工）罷工時，呢位（涉事）員工都未入職，以及時勢唔好欠供應商錢係常態，真係好好笑。

至於被指當員工係「出氣筒」方面，該店續稱：「經理有無當呢位前員工係出氣筒閙（鬧），腦細（老闆）就唔清楚，但聽聞呢位人士（被炒員工）任職短短一兩個月期間多次『射波』、無認真工作、甚至o係（喺）腦細（老闆）面前玩電話，經理最後請佢食『豉椒炒魷』，就係咁簡單！離職後7日如果無出糧可以上勞工處，唔需要等一個月架（㗎）！」

網民批老奉請假有問題

其實之前都有網民質疑呢位黃絲點解可以心安理得地「射波」，「乜××姐」鬧爆：「做黃店啲人係咪都唔可以正正經經返工，定係覺得打黃店工有特權？」「mindless」直斥：「你有個概念一個月老馮（奉）可以請兩日病假已經有問題，我係老細（闆）都炒×你，係病請十日都冇問題。」咁睇法，又係一場「黃圈羅生門」喇。