貴圈真亂|黃店賣內地貨　黃絲跨國狙擊

（香港文匯報記者 雨航）黃圈為爭「光環」同生意而內鬥係常事，但冇諗過黃圈內鬥已經開拓出「國際戰線」。修例風波期間力撐所謂「手足」嘅英國黃店「華南行」，近日竟然俾諗住移民英國嘅黃絲質疑係藍店，原因就係「華南行」堅持賣內地貨。《立場新聞》近日刊出「華南行」老闆Magic嘅專訪報道，內容提到「華南行」作為喺英國嘅亞洲超市，唔賣內地貨就會失去整個市場。講咁多咪又係為個錢字？啲黃絲睇完唔只冇同情，反而揶揄Magic「口裡說不，身體卻很誠實」，覺得佢黃唔晒就唔應該標籤自己係黃，結果又引發黃絲罵戰。

喺相關報道裡面提到，當Magic俾人質疑係藍店就會好唔開心，好似得唔到人哋認同咁。報道話「華南行」對比其他英國嘅華人超市真係年資尚淺，但一直都「堅持賣香港製造嘅貨」，Magic仲話喺英國賣香港產品唔易，好多嘢擺到過期，唯有拎返屋企自己食，但佢堅持嘅理由只為保存同推廣香港產品喎。

Magic又話「華南行」送貨時會隨貨附送香港嘅「抗爭」文宣，更有外國人主動同佢傾起香港嘅事，而「華南行」去年亦將單日營業額全捐畀「612人道支援基金」。報道仲提到，當Magic講起周梓樂、陳彥霖等喺「反送中」期間「犧牲」嘅人仲會眼眶發紅𠻹。

至於點解Magic咁黃都要賣內地產品？佢就聲稱亞洲超市好難唔賣內地貨，否則會輸晒成個市場，到時可能請唔起同為港人嘅員工，亦好難再喺英國賣香港製造嘅產品。

講到咁慘情，有網民就即刻彈出嚟替Magic唔抵，仲鬧返其他黃絲。「Chan Kwong」就質問：「有乜好鬥，有部份（分）心胸窄嘅小人成日批鬥他人，只會漫（謾）罵、翻舊帳（賬），要永無寧日咁！咁樣做人開心嗎？」「Dave Wang」就提醒：「好心唔好再鬥黃，棧（盞）搞到黃店生存唔到下去。」

「Raymond Real」就幫Magic講說話：「其實好無謂，我唔相信啲人自己真係一件內地貨都冇用過。」但「Guong Fok Heung Gong」就認為係Magic自己攞嚟衰：「有心做其實可以，越嚟越多選擇，好多野（嘢）已經搬咗去越南，印度，柬浦（埔）寨呢啲國家做，更平。」

不過，「Ryan Chu」就認為一切都係錢嘅問題：「你幫佢攪（搞）掂個開支，咪唔洗（使）賣中國嘢，賣皇室御用嘢都得。」「Steve Tse」就話：「都係果（嗰）句，你班黃衛兵養得起人，賣made in Mars（火星製造）產品又有乜所謂啫。」「傅琛翰」亦揶揄：「口裡說不，身體卻很誠實。」

被批「黃唔晒就唔好扮黃」

「Mei Miu」就質疑Magic嘅做法：「賣唔出既（嘅）貨坐係（喺）度就有人識欣賞？點解要反而入啲大陸（內地）市場岩（啱）既（嘅）野（嘢）？唔好黃又黃唔曬（晒），就唔好掛自己係黃先，正常做生意冇人會理你」「Athena Yip」就話：「堅持唔到就怨天怨地，理想與現實就係咁殘酷。」