拖手足糧3個月　和你送捲款潛逃

（香港文匯報 記者 郭家好）黃店成日花式呃「手足」。世上最無良嘅老闆唔係唔出糧畀員工，而係唔出糧之餘老闆仲要人間蒸發。講緊嘅係攬炒派勞工團體「勞工組」前日喺facebook發帖曝光嘅一件事。話說佢哋最近收到一單極離譜嘅求職騙局，一間幫人送件嘅「黃色」快遞平台「和你送」老闆都從來冇同任何「手足」員工有過直接接觸，仲要不斷用拖字訣同埋各種藉口拖「手足」成3個月糧。「手足」點催都無影，最後間黃速遞平台更人間蒸發，連社交平台都刪埋，激到班「手足」「紮紮跳」。不過，鬼叫佢哋人一黃，腦死亡，個平台之前咁多疑點擺明有伏，都仲要幫佢哋賣命，𠵱家惟有認衰啦。

「黃色經濟圈」最多係咩？唔係錢，係伏。最新一集嘅求職騙局主角係「和你送」速遞。佢哋聲稱係一班「熱愛香港嘅手足」搞嘅平台，賣點係如果市民唔想用「紅店」順豐或郵局，「和你送」就會以「步兵」、貨Van等形式親自送貨到目的地。

據「勞工組」引述苦主「手足」表示，早喺今年1月初，由於「手足」傻更更地抱住個信字，喺「黃色」招聘平台搵到「和你送」並入職，原本滿心歡喜以為搵到工，點知「我本將心向明月，奈何明月照溝渠」，原來一切都係伏。

話有客服但長期已讀不回

一開始「和你送」聲稱14天就會出一次糧，但14天之後又話要等多幾日，不斷無限拖，每次都有唔同藉口，「試過話票未收齊、轉數快壞左（咗）、轉數快限額爆左（咗）冇得轉，要第二日、又話未計完數、又話老闆喺外國等等。」最後就咁拖咗差不多3個月，而成間公司唯一一個可以搵到老闆真身嘅客服亦長期已讀不回，甚至不讀不回，回嘅就係上面堆「理由」，苦主「手足」稱：「完全收唔到錢！就算同客服講要找卡數、交租都冇理過。」

「勞工組」就話，呢間「和你送」係用「件計」嘅方式造成假自僱關係，逃避僱主責任，可以稱得上係一個零成本嘅運作模式，全部風險都轉嫁畀員工。同時，「手足」唯一會接觸到就係公司客服派單嘅人，只有佢先聯絡到老闆，加上佢哋平時一直只用通訊軟件溝通同埋發布工作，隔絕咗任何同事與老闆嘅直接接觸。

一切都顯得非常怪異，而更加詭異嘅係間「和你送」已經刪除咗多個社交平台賬號，死無對證，真係得個冤字。

「勞工組」就懷疑個客服就係走數嘅老闆，仲話如果唔係，就希望佢上水，一齊追數。佢哋呼籲「手足」睇路，叫大家杯葛「和你送」，鬧佢哋「以黃『手足』名義搵生意，假自僱，玩拖糧，老闆失蹤」，呼籲知情者、受害人提供各種方法搵到個老闆真身。

圍內抽完水 繼續滾塘魚

唔少網民都質疑究竟香港人幾時先會醒。「Benny To」問：「究竟香港人幾時先肯面對現實，就係『黃圈』入面一樣有搵人笨、剝削人既（嘅）×街老闆。講真話又鬧人分化，咁繼續開心咁做豬啦！反正咁多人俾佢搵笨，個老闆開心賺到笑啦！」「肖建邦」表示：「事實上有好多所謂黃店係搵笨×。」「David Ng」認為：「努力工作，為了生活，公司唔肯出糧，耍太極，無資格做黃店，公司必須要回水，盡企業責任。」「梁梓圓」指：「什麼理念都好，於香港最終都會變成短炒項目；而且食相很難看。」

成日標榜所謂「齊上齊落」嘅黃圈，實質上更識得乜叫「齊齊抽水」。

同為「和你」系列嘅「和你車」見到「和你送」瀨嘢就立馬喺facebook發帖話：「拿（嗱），我地（哋）速遞係叫和你派唔係和你送，咪搞錯呀。BTW，血汗錢都呃真係不得好死嫁（㗎）。」

「人血張」「10萬P」未夠 黃色水魚密密有

「手足」入得黃店做擺明係buy個「理念」乖乖哋當水魚，唔少黃店當然就有恃無恐，呃得就呃。刻薄「手足」，肥上瘦下更係常態，好多案例仲轟動一時。

早前自稱為「良心」網購平台嘅「光時」，被踢爆有主管肥上瘦下。當時，有一位名為P嘅部門主管由義工變為受薪員工，當場開價月薪十萬蚊，真係和味過「和味龍」，「恨死」班無工開嘅「手足」。咁其實P佢肥自己都算啦，仲要刻薄「手足」，為咗盤數靚就成日迫做貨倉嗰班兼職「手足」提早打卡，再慢慢cut更cut到啲「手足」捱唔住嗰雞碎咁多嘅人工而走晒。可謂主管月月袋十萬，「手足」日日聽乞食，所以當經過多宗「關公災難」後，「光時」收檔，翻身無望。

早前以「香港人嘅冰室資源分享中心」自居嘅「黃店」龍門冰室，更屢次被揭發食「人血饅頭」，但仍有人「針唔拮到肉唔知道痛」，硬要幫「人血龍門」打工，結果俾人當義工用完唔出糧，雙方最後為咗一千幾百蚊鬧到反面。

暴徒投靠龍門冇糧出仲被追數

話說有「手足」因為參與暴動而失業，走投無路下搵「人血龍門」張俊傑幫手。張見「手足」原本係一位咖啡師，就貪方便叫佢嚟自己新開嘅餐廳幫手，又畀咗「手足」$15,000現金同$5,000超市禮券，叫佢返少份工，留啲時間上咖啡知識深造班增值吓喎。

點知當「手足」讀完個課程，張俊傑間新餐廳就冇晒下文。後來「人血龍門」話要請司機送貨，呢位「手足」見完鬼都唔怕黑，竟然自告奮勇應徵，張嘅「二奶」Kenix Ho見「手足」本身有車，於是就「食得唔好嘥」請咗佢。

「手足」其後向Kenix Ho追返份糧同墊支嘅費用，結果被一口拒絕，仲要「手足」寫借據還返之前嗰15,000蚊，而且今次唔會出糧，叫「手足」倒貼埋油費同隧道費。

對於呢啲指控，張俊傑當然否認啦，仲控告傳播呢啲訊息嘅「手足」誹謗，當然引起黃圈一輪風暴，搞到滿地花生啦。最後，呢單嘢都似乎不了了之。

「香港編年史」 「和你查」皆幫兇

「起底」眾多警員和愛國者資料嘅網站「香港編年史」一直都係「手足」嘅重要參考資料之一。喺該網站嘅「黃色商家」分類中，就將「和你送」速遞列為黃店，更聲稱佢哋已經喺「和你查」度fact check過，極容易令「手足」以為呢間店係無問題，間接幫佢宣傳，可謂「和你送」呃「手足」事件嘅幫兇。

截至截稿前「香港編年史」都未有對「和你送」有任何資料修改，而另一個「手足」常用平台「和你查」就已經寫明「和你送」已結業，但就冇解釋所謂「結業」其實可能係老細呃完錢「走佬」。

黃店頻頻壓榨勞工極黑心

黃店用開「手足」時就頻繁因「糧支」爭議而被鬧冇良知，炒「手足」陣時就更加不擇手段。之前就有黃店被爆炒人唔畀代通知金，又或「手足」離職時被扣人工。呢啲無所不在嘅呃「手足」手段，真係睇到眼都花埋。

要講顛倒黑白，陰招用盡嘅無良公司，就不得不提黃店「膳心小館」（「膳心」）。攬炒派勞工團體「勞工組」之前喺facebook發帖，踢爆「膳心」唔畀代通知金就炒人，仲要扣人工同拖糧。

「膳心」扣糧亂炒人扮純良

「勞工組」當時細數「膳心」3宗罪，第一宗罪係「膳心」明明主動炒人，但又扮事主自己辭職，借此拒畀7天代通知金。「膳心」一度堅持個「手足」係自己走人，「勞工組」放出炒人錄音，即總店經理突然告知「手足」上頭下令要「手足」即日離職。「膳心」最後只能認衰道歉，話「很不幸，經理確認有此對話」，並向被炒「手足」道歉。

第二宗罪係薪金組成黑箱作業，離職時被追扣上個月工資，即出7月糧時冇啦啦扣返6月嘅人工，極不合理。最後一宗罪係拖糧，即「手足」7月尾離職，但到8月中仲未收到店方工資。雖然最後件事經過一番波折都算解決咗，「膳心」當時話會「引咎」結業，但事實佢哋就繼續做生意，繼續不斷咁食人血饅頭。

有「手足」之前喺「豚道樂」返咗兩日工後轉工，事後想搵朋友幫手攞返份糧，「得到回應係做得兩日唔做所以唔會有人工」，個「手足」一度放棄追討，後來因為實在有經濟困難，先搵「勞工組」幫手追人工。雖然經過「勞工組」一番直播踩上門代追薪事件後，「豚道樂」終於肯交返份糧出嚟，但之後亦發千字文批評明明係個「手足」工作態度有問題之類，佢哋都好慘。

開咗工就要出糧係常識，可能黃店就係專呃呢啲食「理念」唔食糧嘅「手足」呢？