《太平紋身店》飾演黃德斌兒子　姜濤嘆動作戲難過跳唱

（大公文匯全媒體 記者 梁靜儀報道）黃德斌、吳綺莉、林德信、姜濤、楊樂文（Lokman）、陸駿光及李賞等，今日（13日）到九龍灣出席ViuTV原創劇《太平紋身店》記者會，有份演出但身在外地未能出席記者會的周秀娜，亦有拍片幫手宣傳。

黃德斌談到拍攝《太平紋身店》的難忘事，他說：「劇集基本上喺太平街取景，因為係一條舊香港既街道好有情懷，拍嘅時候感覺幾好。」對於劇集收視，他直言有信心，加上劇集因疫情關係，斷斷續續花了半年時間拍攝，題材富漫畫感又奇幻，團隊又有新鮮感，希望觀眾會喜歡。問到德斌劇中是否有打鬥場面？他笑說：「有少少打戲，不過我呢啲高手兩下就搞掂。」劇中他與姜濤飾演兩父子，他因兒子退隱江湖，而姜濤卻因他而踏入江湖。二人首次跟合作，德斌指大家合作得好開心，並大讚姜濤靚仔又好乖。

談到有傳ViuTV今年開拍港版《大叔的愛》，吉田鋼太郎的部長角色屬意由黃德斌演出，他並會跟MIRROR的呂爵安（Edan）與盧瀚霆（Anson Lo）有Hehe戀。對此德斌承認有接觸但未落實：「講住先啫，詳情等佢哋公布啦，不過真係有傾過嘅，呢一套係瘋狂式喜劇，以前從未拍過，如果落實拍攝會喺過年前開拍，(劇中要咀男仔，以前試過未？)咀BB仔算唔算？（可介意咀男仔？）到時再算啦。」對於再次跟MIRROR成員合作，德斌坦言目前仍未分得清楚他們，只認得合作過的姜濤及Lokman，亦有留意姜濤的歌曲。

MIRROR成員姜濤在劇中演德斌的兒子，他透露今次是入行以來首次拍打戲，更要應付以一敵眾的大場面，幸好沒有受傷。而演德斌年輕版的Lokman亦同樣要打，加上場面混亂又要兼顧演戲，令他覺得甚有難度，更試過不慎以無情力打傷其他演員，自己也有少許撞傷，笑言比跳唱更難。

早前MIRROR在叱咤頒獎禮贏得多個獎項，身為隊長的Lokman希望待疫情過後能認真慶祝：「依家只能食午餐，大家未起身啦，之後食餐好嘅！（叫姜濤請？）當然啦！」姜濤聞言亦大方說：「嚟呀！食呀！」

姜濤的爸爸早前中風入院，他指爸爸尚有一段時間才能出院，但笑指爸爸知道他得獎後情況似是有好轉，並著大家不用擔心，他說：「因疫情唔可以探病，但之前送咗部新電話畀爸爸，佢有上網睇我得獎片段。」

吳綺莉早前透露，踏入2021年竟收到37年沒見過面的爸爸來電問候。吳綺莉指兩父女相認經過迂迴曲折：「最初父親係透過微博聯絡我同事，姑姐就轉發年舊相畀我，但啲相好舊我都認唔到，姑姐留言話我爸爸一個人喺美國生活，叫我搵下佢。我哋3、40年冇見過面，佢都70幾歲，但把聲仲好壯健好後生，之後我留咗聯絡電話比佢。」她謂父女相認後至今沒有再聯絡，更直言好生疏，畢竟大家沒怎麼相處，不過她也有叫爸爸不如返港，但他又自己安排好了自己的事。問到她會否自己或者叫女兒飛去美國接他回來？她說：「我有飛機恐懼症，如果坐船到美國來回足足一年。」

林德信 (Alex)表示在劇中飾演廚師，劇組特別安排了專業廚師訓練他的廚藝，有時他的揸刀切菜手勢唔啱都會被鬧，但他都鍾意的。Alex透露都有將拍劇時學煮的「慢煮梅菜三文魚」給外公品嚐，連嘴刁的外公都話味道很特別。問到可有煮給爸爸林子祥食？他笑說：「仲未有機會，因為佢仲……(奄尖？)呢個你哋講，但都有煮過「慢煮梅菜三文魚」畀女友食，女友話幾特別，都有煎牛扒畀女友食，我來來去去都係識幾個菜式，即將到來的情人節會循環再做。」