齊齊觀天　星星相識

大公報記者 胡家俊（文、圖）文澔（圖）：自盤古初開，星星每晚便在夜空閃耀，可是現今繁華城市入黑仍燈火通明，市民舉頭難望繁星。

不過，香港有一班觀星族仰天「追星」的熱誠始終不變。前香港天文學會會長梁淦章、太空館館長李為君、可觀自然教育中心暨天文館任天文統籌許浩強，三代觀星人都對星空有着同一份堅持，他們充當「天文大使」，最希望更多香港人能共賞星空，培育出新一代觀星人。

欣賞銀河唔係難事 一年睇足十次八次

很多人會認為：「香港邊睇到星㗎？睇星，梗係去外國啦！」天文專家許浩強（許Sir）話你知，這種想法只答對了一半。許Sir經常教學生，只要多留意天空、加點耐性，「原來好多星座，唔係你想像中咁難睇到嘅。」

自小對宇宙有很大興趣的許Sir，由年幼時去太空館參觀，到中學參加天文學會學觀星，讀大學主修物理但亦選修天文科目，畢業後任職可觀自然教育中心暨天文館任天文統籌。他舉例，天文館旁近年獲批興建了兩個私人屋苑，大廈加上燈光，遮擋了半邊天空，「睇少咗兩三成星星。」若要欣賞銀河，從前可以在上水、曹公潭便能抬頭望見，現在只能往萬宜水庫東壩、浪茄、蚺蛇尖等偏遠地方。許Sir教路：「睇銀河唔係想像中咁遠，一年適合的天氣，加上無海面漁船的光害，一年睇到十次八次銀河都唔出奇。」不過在香港，那其實只像一片高層雲般的光度，不要奢望景色壯麗。

「以前睇日食，我會準備好多相機，至少一部影大特寫，另一部影廣角。」許Sir說，其實香港的後生仔影星空毫不失禮，在過去五至七年，每隔一年總有新星從世界級地理雜誌的攝影比賽獲獎。

許Sir早已多次攜同相機遠赴外地觀賞日全食、北極光，但從沒有放棄觀星，因為體會到「唔單止自己睇開心，原來教人一樣咁開心。」他近來教市民怎樣在九龍仔公園、荃灣海濱等市區範圍，使用天文望遠鏡觀星，要觀賞北斗七星並非難事。可觀天文館擁有巨型望遠鏡，0.5米口徑的主鏡曾是全東南亞最大的望遠鏡。許Sir親身示範，只要天朗氣清，即使是大白天，透過天文望遠鏡可以輕易觀測到織女星，令人稱奇。「觀星就係幾傻嘅活動，一班傻人可以望住個天一晚，可能只係為咗一粒流星，其實只係太空中嘅一粒塵埃跌落地球，我哋就咁開心，其實開心可以好簡單，仲可以睇足咁多年添。」

火流星噗噗有聲 我嗌到收唔到聲

屹立於繁華鬧市中的香港太空館，今年踏入開館40年，「菠蘿包」般的獨特外貌從不過時，恰如星空不變。身為太空館一館之長，李為君在本港推動天文活動，肩負「把星空還給市民」的重任。他認為，要感受宇宙的美，其實易如反掌，「The sky is always there，星永遠都喺度，喺夠黑嘅夜晚，你只需要坐低、岳高頭、畀啲時間，咁你就可以望見，好好enjoy（享受）。」

由年輕開始，李為君喜歡觀星、辨認星座，但他自言是理論派而非觀測派。「我睇好多書，鍾意尋根究底，太陽系、黑洞啲嘢我都識，新星、超新星、星系全部都冇問題，但如果擔支望遠鏡出去郊外睇星觀星，我就唔多囉。」

他曾任教中學，在太空館開館較初期的八十年代尾入職，其後曾借調到其他部門，終歸回到太空館任館長。他在太空館前後30年，是現時最老資格一員，「我慶幸有機會遊走不同工作崗位，熱愛數理天文的初心始終如一。」

天文學上，星體之間常以光年為計算單位，光年有得計算，但觀星有太多事無法預計。要數最難忘兼回味的觀星經歷，館長說一定是1998年的獅子座流星雨。

當年，他趁預測「最大雨」之前，隨朋友坐船去到東涌更入的僻靜處視察，看看天空夠不夠黑、交通是否難以到埗，誰知卻意外撞中「暴雨」。「以前啲書講彗星、講流星雨，都係得啲版畫、圖片，你唔會expect（預計）原來火流星係『噗』一聲有聲，仲有啲雙響炮，兩個火球『蓬蓬』咁出嚟，啲火球一路飛向西面，我不停喺度嗌『火流星呀呀呀』，嗌到聲都收唔到。因為有啲一爆，你係盲咗咁，好似啲人喺你面前開閃光燈咁光！」

時代不同，科技躍進。李為君一代的觀星族，由以前揹一支沉甸甸的望遠鏡上山「追星」，轉變成拿起輕便數碼相機，已能捕捉銀河星象，「以前啲老前輩要搵啲新空天體，都要求一晚要搵到幾多粒會飛星體、考天體認識程度，考對支鏡幾熟。而家？個個用電腦，一search就搵到資訊。」

改裝「好奇號」模型 向後人推廣天文教育

梁淦章是香港觀星界的活字典，他觀星超過40年，監督過香港太空館的籌備興建工程、擔任過香港天文學會會長近25年，是觀星族推崇備至的前輩。他現已屆退休年齡，正以另一身份再出發，兼任國際天文聯會香港地區的聯絡員，除了推廣天文活動，他還有個小小心願，「好想向香港年輕一輩留低觀星經驗，帶佢哋認識宇宙嘅美。」

天文離不開觀星，「觀星好得意，你係咩層次嘅發燒友，都可以用自己的方法去享受。」梁淦章與天文淵源甚深，讀書時期已對浩瀚宇宙抱有無窮興趣。「六、七十年代無咩天文會社，無窿路、無人帶，自己可以喺書本睇星圖、認星座，但對住個天仍然好難認。」

「喺我嗰代，真係有一班好志同道合嘅天文同好，例如讀電子出身嘅一班人組成『射電組』，自製射電天文望遠鏡。」到後來，互聯網開始轉變會社形式，他也轉而着重教人如何擔當「天文領袖」，全因「香港天文始終要有新一代接手」。

他很擅長動手改良模型。他珍而重之展示火星探測車「好奇號」的紙模型，是他從美國太空總署（NASA）網站下載，繼而動手砌出。特別之處，是把本來「黐死晒」關節位統統改裝，能模擬鑽孔取土地樣本、將訊號傳送地球等動作。該模型能夠模擬出真正「好奇號」若有一邊車輪遇上山丘擋路，車底的槓桿結構隨即能控制另一邊車輪相應下降，避免翻車。

今年之最：日偏食最好睇 「木星合土星」最罕

在2020年多個本港能夠一見的天文現象中，可觀自然教育中心暨天文館天文統籌許浩強說，六月的日偏食是香港難得一見，評為今年最佳天象，「今次日食係『食到九成』，剩返一條香蕉咁細嘅太陽。」

許Sir分享道，當時他有些熟稔的天文愛好者，趁機拿着濾光卡落街與街坊一同欣賞日食，「好多年都冇一個天文現象，係可以有咁多人、咁容易參與到，係開心嘅。」

今年另一個矚目重頭戲──12月的雙子座流星雨，因為不受滿月影響，本來非常適合觀測，可是在14日的流星雨高峰當晚，香港「撞正」陰天密雲，結果許Sir的鏡頭也無法捕捉到流星，是全年最令人感到可惜的天象。

至於今年壓軸、將於明日黃昏出現的「木星合土星」是較為少見的天文現象，木星和土星運行至黃經相同的位置，約每20年才出現一次。許浩強稱，今年「木星合土星」相當貼近，他非常期待欣賞，並評為是今年最罕見天象，「仲近過本身睇住個月亮嘅大小，我以往都未見過木星同土星可以黐得咁埋。」