鍾嘉欣MV拍攝探班

(大公文匯全媒體記者 梁靜儀）鍾嘉欣今日為有份參演的劇集《兒科醫生》主題曲《好好珍惜自己》拍攝MV，星夢唱片公司老闆何哲圖亦有到場。嘉欣表示已多年未有為主演的劇集唱主題曲，對上一次已是六、七年前的事，今次很多朋友聽完首歌都聽到毛管戙及喊。

嘉欣表示今次有份參與填詞：「首歌係半年前我喺溫哥華作o既，冇諗過會成為主題曲，我有幾首歌o係手，畀左何哲圖聽，佢揀選左呢首歌，我有份拍呢套劇，知道故事來龍去脈，所以覺得首歌加埋套劇係絕配，首歌係我作曲，我填o左兩行詞，之後我同填詞人傾o左兩個鐘講畀佢聽我想表達嘅意思，而佢將啲詞美化同昇華o左，好勵志o既，我聽完就喊，好感受到個感覺，我o的朋友聽完第一個反應都係毛管戙同喊，老公同仔女都聽過都話以我為傲。」嘉欣表示因錄音前已聽過了多次，所以錄音時沒有喊，但拍攝某些場景前都會聽這首歌，令她更投入拍攝。

由溫哥華返港拍劇已有三個多月的嘉欣，因此很掛念兩個子女，她說：「比想像中難捱，今次算係離開小朋友最耐一次，原本諗住我返來香港兩個月安頓好之後，小朋友就飛過來，但我隔離完冇耐，香港嘅疫情又爆發，所以打亂咗少少個計劃，而家都有啲唔知點算，因為溫哥華疫情有少少暴漲，因為我仲有36日戲份就拍完，如果小朋友嚟到我會留耐啲，否則拍完劇我就即返去溫哥華，我已經執好行李，安排好晒。」

嘉欣表示每晚都會與仔女視像，她最擔心是大女，因為兒子還細，有時視像打完招呼便行開，對她不太留戀，但個女就會話掛住她，叫她立即回家，不過他們在溫哥華有有好多人錫，也不是掛念得好辛苦，反而她獨自在港掛念得更多。她又感謝老公為她犧牲，因為他都都好辛苦要飾演兩個角色。問到經過今次後，還會否願意返港拍劇？嘉欣也不太肯定說:「呢一部係唔係最後一部劇唔知o架，可能十年後先再拍多部，始終一走就要走咁耐，我自己個心都唔知點算，做媽咪好難去抽離，再拍要考慮清楚，我希望每一部都做到最好，咁就當呢部係最後一部劇，心態會想做得更加好，屋企人咁支持我就更加唔想令佢哋失望。」