稱延任先「幫到手」 黃碧雲圖食「人血饅頭」

大公文匯全媒體報道，「鴿黨」(民主黨)立法會議員涂謹申日前同「抗爭派」立法會議員朱隊友(朱凱廸)搞咗一個記者會講12人蛇事件兼想為自己加返分，但已成為「鴿黨」負資產嘅一嚿雲(黃碧雲)就偏偏出嚟「助攻」破壞成件事，佢質問：「朱議員如果撤退，就不能再用議員身份幫『手足』家屬。『民主派』議員若總辭，難道叫家屬去搵『保皇黨』議員?」。言論一出「抗爭派」當然繼續追住打，而前「香港大專學界國際事務代表團」成員邵嵐就鬧一嚿雲「無恥至極」，話當全世界都諗緊辦法幫12人蛇，「你黃碧雲喺度大大啖食人血饅頭、推銷你民主黨留守議會嘅主張。」

一嚿雲立刻知衰刪貼文兼道歉，稱「本人明白將兩件事扣連或混為一談並不恰當，可能會令被扣押港人及其家屬感到冒犯及不安。因此，本人決定收回有關言論，希望他們接受我至誠的道歉」。除此之外，仲搞到「鴿黨」都要出嚟向被扣押者及家屬認錯致歉，真係多得一嚿雲唔少。