攬炒區議員no show 連登仔：乜嘢都冇×做過

（香港文匯報記者 杜思文）攬炒派區議員借暴上任已逾半年，但成班人只識喺區議會鬧政府，唔理區務累街坊。就連身為「自己人」嘅「連登仔」都睇唔過眼，發帖叫大家點評自己嗰區嘅區議員做成點，點知大家不約而同喺度發牢騷：有啲區議員選到就唔見人，唔做嘢但就為今年立法會選舉做準備工夫，facebook 經常更新就「自覺」做得幾好，永遠唔去「前線」，東涌南嘅區議員王進洋更被點名，話佢搵唔到人又唔覆訊息。有「連登仔」就開始擔心四年後嘅區議會議席，會畀返晒建制派。

喺該討論中，雖然有「連登仔」話有「素人」做到嘢，但大部分網民都係不滿攬炒派區議員「no show」。「今天的我」話，自己住坑口西，「將向天晴」余浚寧「完全無影」。「NMSL」就直接話佢個區議員「幾廢」，「自己區入面有大事，永遠係隔籬區議員快過佢到現場。」

網民諷當選謝票後再無蒲頭

「刨J解牛」亦話，自從上次區選謝票後，「未見過（當區區議員）佢蒲頭。」「數據庫存在著名字」就話無見過區議員人影。「花名」則諷刺道：「幾好， Facebook page 成日更新。」「大師兄黎明」亦話攬炒區議員「唔做嘢」：「幾好，（建制派的）支持國安法banner周圍都係。」

有「連登仔」更指，有區議員平日唔做嘢，但已經開始籌備立法會參選。「狗衝」就話，「選完自己區失蹤，地區乜都唔做就學人想選新東立會。」「c=====3」亦話，「『泛民』表現根本唔值得再當選，佢地（哋）佔有既（嘅）議席根本對政府既（嘅）壓力幾乎係零，唔係靠手足行前衝立法，『港共』政府根本唔放『泛民』在眼內。」

攬炒區議員既然公然煽暴，點都應該落「前線」幫吓手啦，但有「連登仔」就抱怨唔少攬炒派區議員都「叫人衝，自己鬆」。「吉高由里子」話：「新人不過係老鬼做區佬，叫佢去衝去（示威）睇場就唔見人，D（啲）蛇齋餅粽就做得幾足。」

王進洋被點名 搵佢永無覆機

「干將大哥」就自爆住喺富東，即係王進洋嗰區，「雖然打敗左（咗）周浩頂（鼎）好×爽，但新果（嗰）個（王進洋）好多社區野（嘢）都做唔到，我老母搵佢幾次都搵唔到佢，問佢助理，佢地（哋）都唔知佢幾時會翻（返）工。」之後佢又訴苦話，「今期無×啦啦收多我幾倍水費，打極水務署都冇人聽。」

王進洋睇到連登帖子立刻急急腳貼咗幾張派單張嘅相，話搵佢唔到係因為自己冇辦事處，要同街坊道歉。「有網民街坊話好難搵倒（到）我，在此要講聲抱歉，我都感到難過。」仲賴係因為「房署唔比（畀）我地（哋）用東馬樓互助委員會做Office（辦事處），所以門口位放唔倒（到）宣傳品。我地（哋）會盡快搵倒（到）好位置，同開多啲街站見街坊」，又話𠵱家會定期落區散步巡及流動派單張。

「Mei Nagasaki」見王進洋派單張嘅相片，又無易拉架又無名牌，「恨鐵不成鋼」咁罵佢：「你以為所有人都認識你，或者未如你所想！上面嗰啲相只以為有個年輕人在派傳單！」又教佢話：「就算未有office，都應該有一個區議員電話號碼，可以打或者留言，會唔會都會比較理想？」點知「Anahita Lo」即刻拆台，暗示有咗議辦電話都冇用，因為「messenger都冇人覆」。

有「連登仔」就開始擔心攬炒派下一屆就要「還」。「perfectcy」話，「其實有d（啲）區一早估到四年後比（俾）對家拿翻（返）個位。」「太言」亦話自己唔係想倒米，但區議員「真係一樣野（嘢）都冇×做過」，又話「後生就話識得唔投民建聯。但叫中年以上選民下次點投你」。「數學」亦話，「對家」區議員日日出嚟，「好驚下屆連任唔到。」